أطفال ولكن عظماء
شهر الكرم فى نهايته يهل العيد
ينور قلوب البشر والكل يبقي سعيد
الناس تكبر للصلاة علشان ثوابها يزيد
تفرح الأطفال وتلبس جديد ف جديد
طفل وياه العيدية ضامم عليها الإيد
وطفل فرحان مع أهله بيرددوا الأناشيد
وفرحة الطفل ويا أبوه كبيرة بالتأكيد
طفولة تملاها الأمانى ديما فى يوم العيد
والكل فرحان بيهنى بالحب والتغريد
------------------------------
لكن فى وسط الفرح فيه طفل همه شديد
إيده على خده والقلب مليان تنهيد
يلمح دموع أمه نازله كلها تسهيد
القميص دايب ولا عنده حاجة تفيد
والفرح بدرى نسيه والضحكة عنه بعيد
والأم حيرانه وخايفة تمد الإيد
بالدمع سهرانه والهم سور بحديد
ضاع الحنان منهم بدرى قبل العيد
----------------------------------
الطفل نادى يا أمى صحيح النهارده العيد
شايف كل أصحابى لابسين جديد ف جديد
وصاحبى اللى جارنا مع والده شوفته سعيد
وأنا معاكى يا أمى هنا فى همى ابقى وحيد
---------------------------------------
زى النهارده يا أمى إدانى بابا هديه
وجيرانا تهنينى و م الكل خدت عيديه
وعلى خدى فاكر بوستك يا أمى جنب عنيا
وعيديتى معاكى ياأمى البدلة ويا طقيه
وبعد الصلاة بابا خدنى وباس لى إديا
وقالى يا روحى تع نمشى بره شويه
وعدى عليا العيدوياه هنى وحنيه
وكانت الفرحة لينا من بدرى مستنيه
وليه النهارده يا أمى الفرحة متخبيه
----------------------------------
فاكره
فاكره يا ضنايا وقلبى عليك مجروح
وجرح قلبى يا كبدى كان غياب الروح
فاكره ولسه فاكره البسمة اللى راحت
والحنان اللى ضاع وعليه الدمعه سالت
وبعد منه يا عقلى العيون م الدمع دابت
القلب مكوى عشانك والنفس م الهم شابت
طب إيه العمل والضحكة هربت منا وغابت
------------------------------------
لكن يا ضى العين
دى النظرة فى عيونك دى أجمل عيد
والقلب هيصونك مإنت فى قلبه وحيد
والفرحة جات مع طفل شايل هدوم العيد
ونادى يا صاحبى تع سلم ومد الإيد
دى هديتى ليك من قلبى بحب شديد
أرجوك إقبلهاعشان أفرح معاك بالعيد
وياك هنفرح كلنا ونغنى وتبقى سعيد
-------------------------------
والتانى شايل هديه وعيديه بعلبه شيك
يقول معقولة تبقى لوحدك والكل مستنيك
فرح عيون أمك وإحنا هنفرح بيك
امسح بقى دمعك أصحابك ينادوا عليك
رمضان دا شهر الكرم وللأمل يهديك
ربك سميع وعليم هينور ظلام لياليك
-------------------------------
