فص حلم وداب
الليله أخر صورة للأحلام
الريح بتمشي ورايا ف جنازتي
وبيتخنق صوت الكلام
صعب الغنا
صعب السكات
متعزنيش يا بدن مش حى
أصل اللى مات ملهوش جسد
انا لما إيديكي النونو ضموني
روحي خدتها فرصة وسابتني
وبلعت ريقك وعيوني عاتبوني
إنى ماسبتش صوتى يندهلك
كنتى ممتازة فى أدائك
كنتى تستاهلى الجوايز
وانا كنت محتاج إنى افهم اى حاجة
بالكلام أو بالاشارة
اصلي مدرستش حضارة
كنت جاهل
كنت فنان بس فاشل إنى أفهم معنى لوحتك
كنت خايف لو صارحتك
إنى مش شايف ف الوانك جمال
وإن رسمك لبتسامة طفل مهزوم الامال
فيها شئ م السوريالية
قولتى فيا كلام كتير
قولتى عنى ملاك برئ
قولتى أول سندباد ف وش موجه يكون جرئ
معقول نسيتي
إن سندباد من غير سفينته
يبقي واحد تانى غير السندباد
سندباد فارقته روح المشاعر والشعور
سندباد مربوط ف ساقيه مغميتنه
مع إنه أعمى معصبينه
عشان مهوش مسموح يوصل له نور
كان يادوب فص حلم وداب وباش
ومعدتش ينفع ليه ظهور
