محمد حامد
حلمين رخاص
===========
أنا ذنبى أيه
أنى بحب الناس كده
يمكن أكون أنسان بسيط
وقلبى بيشبه كل غيط
حتى البيوت اللى بتشكى
للشوارع همها
ساعات ف قلبى بلمها
زى العبيط
يمكن أكون واحد عبيط
علشان بحب الناس كده
وبخبى فى ضلوعى
الوجع
علشان عينيا متشتهيش
ضحكه سلف
ومعرفش تانى أردها
وأزرع غيطانى كلها
يمكن تنبت حلم بكر
وحلمين رخاص
بيتى الفقير
مش أى بيت
بلاص وزير /فرشه وسرير
وحبه وفا لوالدى اللى مات
يمكن ساعات
بتشوفنى أصحابى كده
شاعر وبس
يمكن أدس ف حزنهم
حبة فرح
من غير ما أحس
