محمد أبو الفتوح
رقــــــــــصــــــــة الـــــدراويـــــش
_-*-_-*-_-*_ـــــــ_-*-_-*-_-*-_
ماشيين ف قلب اليوم والقلب مش محتار
ف الليل نلاقى نجوم والصبح شمس نهار
لو هجمت الأكاذيب .. الحق سيف بَتّار
يقطع رقابى الزور وينوَّر الأسرار
نقطف زهور الكون .. أنوار على أنوار
* * *
وتقولِى كيف العِشق مسربلَك بعطور
أقولِك انى عرفت ان الجمال مستور
ف عشت جوَّه السَتْر .. بقى منى ليه على طول
أصبح ف ورقة شجر وانام ف موجة بحر
وابات ف كوخ صياد ما يزيدش عنه القصر
واما جريت ع الرزق .. من بعد أكلة فول
عرفت كل الفرق ما بين كَرَامه وسحر
* * *
يا رقصة الدراويش ف حته مانشوفهاش
لولاكى كنَّا حَجَر .. وكنا رحنا بلاش
لولاكى كنا نغِير م المَجَرى ف القشَّاش
ولا غنيناش " يا وابور " إلا امَّا يدفع كاش
* * *
لا كان مؤلف كتب بحروف كلام ما شافوش
ولا مزيكاتى سمع ف الريح نغم منقوش
ولا حتى مَلِك انجَعَص وبثوره راح مكشوش
لا حد قال خطتى .. ولا كيف ف لحظه باش
* * *
وتقولِى خدنى معاك! .. طب ما انتى ويايا
من قبل ما يزغرتوا وينادوا ع الدايه
إنتى اللى زادك وَصَل والجسم كان واهن
وميِّتك نبعها جرَّى الحياه فيَّه
عملتى مالا يعمله عرَّاف ولا كاهن
نحرتى فيَّا الخوف .. ودفعتيلى الدِيَّه
* * *
طرحتى فيَّا الأمل لايام كتير جايَه
ولاَّ انتى نسَّايه؟
أيوه انتى ويايا بس الحقيقى بجد
إنتى مش الغايه
* * *
أنا غايتى وجه النبى .. غايه وما اكرمها
تشفى الصدور م الضنى .. يا بخت مِن رامها
من شرقها لغربها .. شامها وأروامها
أنا غايتى وجه الذى منُّه إليه ماشى
وبيه وفيه مهجتى يحمَى اللهيب فيها
لهيب ولكن بَرَد .. دبَّحتله كباشى
فدا نظره واحده تفوت كل النعيم فيها
تطلق عنان الروح وتداوى أسقامها
أنا غايتى وجه النبى غايه وما اكرمها .
----------------------------------
