محمود عمار الزلباني
((((((انت فين))))))
ــــــــــــــــــ
الدمع سايل ليل نهار
ع اللى راح ومش لاقيه
بعده الحياة بقيت مرار
دا كان شايلنى فى عنيه
ــــــــــــــــــــــ
يا عينى ليه بس الدموع
ومنك الخد إشتكى
البعد كاوى لى الضلوع
والحزن علمنى البكى
ـــــــــــــــــــــــــــ
الحياة بعدك صعيبه
البعد جارح للقلوب
معاك كان لينا هيبه
يا رب نسينا الكروب
ــــــــــــــــــــــــ
قلبى صورتك بتناديه
والعقل صورلى حاجات
القلب انت بس فيه
والحياة صابها السكات
ـــــــــــــــــــــــــــ
تعالى زورنى فى المنام
نفسى ألمس مرة إيدك
تعالى سمعنى الكلام
يلى دمى من وريدك
ـــــــــــــــــــــــــــ
عليك يا با با ألف أه
لو البكى هايرجعك
أبكى أنا طول الحياه
أبكى لحد ما أسمعك
ــــــــــــــــــــــــــ
بعدك ما حد حس همى
إسودت الدنيا ف عيونى
لاخالى سأل ولا حتى عمى
معرفش يا اباليه فاتونى
ــــــــــــــــ
أمى ما نشفت دموعها
بعادك شيلها الهموم
إنطفت منها شموعها
وسماها مليانه غيوم
ــــــــــــــــــــــــــــــــ
كاس المرار بعدك شربناه
والهم واصل للكتاف
طعم الهنى مرة ما دقناه
بعدك ما حد عليا خاف
ـــــــــــــــــــــــــــــــــ
الصبر والدمعه صحابى
واللقى أصبح سراب
وفاتح للهم بابى
واللقمة مره والشراب
ــــــــــــــــــــــــــــــ
مين للقلب يهنى-
ويباركلى فى النجاح
كنت بأسمعلك تغنى
والغنى أصبح نواح
ـــــــــــــــــــــــــــــــ
سايبنى من بعدك يتيم
طالب عطف القلوب
بعد ما كنت النسيم
ودوبنى الحزن دوب
ـــــــــــــــــــــــــــــــــ
عليا ليه طولت الغياب
نفسى فى شوية حنان
السكة مليانه ضباب
كنت بتنورها زمان
ـــــــــــــــــــــــــــ
نفسى أضحك يا ابا تانى
نفسى يفرح نن عينى
نفسى ترجع يوم عشانى
نفسى أشوف حزنى ناسينى
ــــــــــــــــــــــــــــــــــــــ
مشتاق يا ابا للعيون
اللى فيها كنت ساكن
البعد خيب لى الظنون
والحياة بقى لونها داكن
ــــــــــــــــــــــــــــــــــ
البهجة من بعدك خلاص
راحت تخبط ع الجيران
الحزن بقى هو الاساس
الفراق جه قبل الأوان
ـــــــــــــــــــــــــــــــــــــ
الفرح بعدك خاصمنى
والضحكة نسيتها الشفايف
والزمن يمكن ظلمنى
وعايش فى الدنيا خايف
ـــــــــــــــــــــــــــــــــــ
نفسى أجيلك بس كيف
مشتاق لنظرة عيونك
فراقك ما كان ع الكيف
مشتاق لضحكة جفونك
ــــــــــــــــــــــــــــ
