قول إن شالله
مكي دياب
قول إن شالله
أنا المختار
وكل الخلق عرفه أنى ب أبنى جدار
وفارد كل اجنحتى عليك بحصار
ومتزنهر عليك وعليه ب كاتيوشا وصواريخ نار
ما مكتوبة هناك في اللوح
أنا المختار...أنا السامي...وجدنا نوح
ف انسي يا روح ما بعدك روح
منين ما تروح!!
ويا حسب الله تاخد رية
وقول لسكينة يا سكينة ما فيش ميه
ولا لمباية للخيه
ولا املايه تتحقق تقول:جيه
ولا فيش تانى ليك زيه
وكل الهئية وأعضائها ليها الطايب وليك نية
مافيش إنعاش ولا إفاقة
وم الفاقة
عليك تآكل من الطاقة
بزيت طاقه
وببطاقة ترم العضم
وإبرة لضم
ترف معاني افهمها ده شغال لطم
وبيعاني بعسر الهضم
كده ح افرح!!!!
واسيب لك حتة م المطرح
واسمح لك بصالة عرض وب مسرح
وأنا السناريست والكاتب وللرمزية أنا اشرح
وفيه تطرح فروض طاعة
فى 100قاعة وسماعة
وتنشر قولي شماعة
كده ممكن أوزع لك لبن بودرة ورضاعة
ومونة معونة وبضاعة
وببتاعة
ده كان قرصي
وكان درسي اسيب ورثى
وفين ما تدق ليها ارسى
لكن والكون ودين الله
بعبد العال وحسب الله
ورية فى ايدها ماشاالله
وأيد مع أيد تزيد قلة
نجيب رجلك قول:إن شالله
وطوبة تقول:يا عبد الله
ده متخبى خده ياله
ومكتوب لك فيها مذلة
ومكتوب فيها كل الكون لنا مصلى
وبشة ورشة بالغلة
ومارش النصر يعز فهولنا حسب الله
قول إن شاالله
