يا الف جرة عسل
محمد البلاط
يا الف جرة عسل ليه طعمك قلب بمرار
وصبح اللى بينا شغب بين قط وكلب وفار
فيه اللى سعده فى كذبه وفيه اللى طالب تار
وميزان حق رقص على الف طبله وطار
مظلوم وظالم وتاه حقه وناس ثوار
و ناس قصوره اتبنت من ذهب وعاج
الغدر منهم عمل للحقد من الماس تاج
باعوا بأيديهم وطن وما حسوا ليه بأشواق
والنيل مائه قلب من حلو لحراق
غنوا لحب الوطن غنوه رياء فى رياء
يا حنجره بالاااه مخنوقه شاوريلى
ولو برسم قلم صوره تدلينى
جايز فيه ضوء ينبعث منك على عينى
وانفض غبار الامل عن حلم فى خيالى
مسجون وساجن وطن على رف سجان
ندب الوجع فيه اترفع جرى دموعه انهار
قتل ابتسامة دلع كانت على الشجر ازهار
يا الف جرة عسل ليه طعمك قلب بمرار
وصبح اللى بينا شغب بين قط وكلب وفار
فيه اللى سعده فى كذبه وفيه اللى طالب تار
يا الف جرة عسل ليه طعمك قلب بمرار
سامع اهات الوطن بتقولى احينى
وحلوا عنى الكفن وفى نهر ارمينى
جايز شراع الامل فى يوم ينجينى
او حتى دمع العجز فى الحزن يواسينى
همى ولو بالعوز بعيد عنكم بيرضينى
