سامحتك
محمدعبدالرحيم
كان واجبى
آجى واهنيكى..
مش هوه بس
اللى دعانى
واقول نسيتك
من قلبى ..
من قبل مايقولها
لسانى
واطمنك
إنى مسامحك..
وكفاية شوقك
فى عينيكى
............
بغنى والإحساس
خنى..
فى بسمة
من دمعة حزينة
سامحينى
لوصحيت جرحك..
وبصى للناس
حوالينا
ضى الشموع
يفضح شوقنا..
لوجت عينيهم
فى عينينا
واناببتسامتى
ببكيكى
.............
مين اللى عاشك
بخياله..
ومين وهبلك
ايامه ..
كان فينا واحد
بيقرب..
والتانى بيعيش
اوهامه
واناكنت وياكى
التانى..
اللى اشتراكى
لأحلامه
وباع فى قلبك
امانيكى
................
وروحت لها..وسلمت عليها..وهنيتها بحياتها الجديدة ..ولبستتها الطرحة بنفسى..وغنيت فى فرحها..وسبتها وانا شايف فى عينيها دموع بتتكلم..وكأنها سطور بتحكى قصتنا..ونسيت اتأسف لها على انى حلمت فى حبها كتير..وهية كمان حلمت معايا..ولماصحينا..صدمنا الواقع بفارس تانى ماكانش فى الحسبان..وخطفها بحلمها على حصان الحزن والأسى..وسابنى اعانى من بعدها..وتعانى هية من بعدى
