كان فى ويا صاحبنا كام صوره
صوره بيضحك ويا صحابه
صوره ويا العيله ف لمه عيد
صوره وهو بيجيب اجوال
ماتش بلاستيشن بيزيد ويعيد
صوره ويا مدرس دين
صوره وهو بيهتف فى اذاعه مدرسته
وصوره وهو بينادى على مامته
ياماما جعان متاخر ع الدرس
كان تعبان جدا اوى لما
طول اليوم ياماما ماكلت
وصوره ف برواز كان عالى
قرب منها ماشفش حاجه
كان فاكر نفسه طويل
لما وقع وكانه بيشبه باب التلاجه
وقام من تانى يبص عليها
ماعرفش
كان فى وياه صوره قديمه
من ضعف نظره فضل مقرب
وماشفش
رجع البومه فى نفس مكانه
وفضل يضحك كتير على نفسه
معقول يعنى مش فاكر صوره
بيدعى يارب ماينسى كمان اسمه
وقام صور بكاميرته كام صوره
علقهم جمب الاباجوره
علشان كانت قريبه من الارض
من طبع الانسان لما بيكبر
مابيعرفش الطول من العرض
