الرئيسية » » تصويت | ميسرة صلاح الدين

تصويت | ميسرة صلاح الدين

Written By هشام الصباحي on الاثنين، 11 أغسطس 2014 | 6:05 ص

تصويت 
------

صوت :
عمالة الأوضة بتهضمنى
والخوف بيمصمص فى كتافى
أخرج م الباب ولا الشباك
مش كل النهايات فى الاخر
بتودى لبعض
عمالة الاوضة بتهضمنى
خرج الصلبان
خرج الجامع 
خرجت أفكارى البوهيمية
وفضلت لوحدى
بدون سكر وعسير الهضم

صوت تانى خالص :
م اخدش من الدنيا كتير
مداش برضة الدنيا كتير
ومفيش احلام يجرى وراها
يحلق دقنه
يحلق شعره
ولا يربى الحزن معاهم
طعم الايام 
مبقاش فارق
حتى الشتا 
مبقاش بيبل شوارع روحه
اللى هجرها الطير والناس

صوت غير الصوتين اللى فاتوا :

طعم الايام مبقاش فارق
النهايات بتودى لبعض
وأنا سبت الشباك مفتوح

التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.