سيجارة اخر الليل
ميسرة صلاح الدين
عمال بيsearch على الnet عن حبه الاول
وولاده سايبهم للفضائيات بتربيهم
كانت هى بتكتب شعر
كان هو فى فريق التمثيل
اما الايام كانت مسرح
بيوزع حزنة على الاتنين
اسمها مش موجود ولا ليها جروب ع الface
قام دور باسم قصيدة كانت كتباها عن الموت
" الموت مش اغمق من كوباية الشاى
مش اصعب من فوران القهوة
مش اعقل من دوامة التفكير
اللى بتتمرجح
ويا سيجارة اخر الليل "
ملقاش غير اخبار
عن سهل دمشق
عن تكريت والبصرة
وصور من بنغازى
وكردستان
وبقايا مسلة قديمة
من عهد الاسرة الرابعة
انشقت نصين
دور عن شعر وشعراء
عن اول بوسة
اتخطفت تحت السلم
عن اول بنت
يمد ايدية تحت جيبتها
وتمد ايديها
وتخطف منه الولاعة
وتلسعة فى ايديه
دور عن صور الاطفال
يمكن تتطلع ام
ملقاش غير
اطفال اراكان
والدرة اياة
وشوارع بتسن سنانها
لاطفال تايهين
دور عن عم خميس البقال
كان هو اللى مربيها
يا خسارة
مات من سنتين
ومكانه اتبنى hyper market
فوق منه Spa
دور عن ست الحسن
عن بنت بتفهم لغة العصافير
وبتوهب نفسها للعالم
شمعة تدفيه
ملقاش غير جماعات التكفير
والرجل اللى بيتحول ذئب
والفيلم اللى بيحكى
ازاى الناس قبل نهاية العالم
راح تاكل بعض
مبقاش فاضل غير site ال Sex المعتاد
لقى فعلا واحدة بتشبهها
فى كل الاوضاع
طلع مخزون العشق
المكبوت جواة
واتوضى
وصلى الفجر
ونام
