أنا كالطير فـ أحزانه
************
تعاهديني؟
نضم الكف والضحكة
تكون نصين
يغني الحلم ف عيونا
نمد الخطوة والسكة
هتطرح زرعنا فرحة
وشوق وحنين
تعاهديني ؟
ما أنا أصلي كطين الأرض
أصون العهد لو كل البشر خانوا
وانا طرح التراب للورد
أنا فله وريحانه
أعيش العمر لجل الغير
وأكون الطير
ف أحزانه
بيشرد عن عيون الناس
عشان ما تحس حرمانه
تعاهديني؟
أنا متربي ع الفطرة
ولا أعرفش اللوع والهجر
أنا بستنشق البسمة ف صلاة الفجر
أكون كالزرع يستنى خيوط النور
أنا الساحر وانا المسحور
أنا بستان وفيه الورد
عاش مهجور
تعاهديني ؟
تكوني لقلبي نص الروح
واكون روحك
ما انا فلاح
وطبعي البوح
أبويا تملي كان بيقول
(ولا تكونشي كأرض البور
لا هي بتطرح الزرعة"
ولا بتكسب خطاوي الناس
فكون الأرض ف غناها
بتطرح كل خيراتها
ولا تشتاق لغير حبة
خيوط م النور)
تعاهديني؟
