محمود عمار الزلباني
((((اللى بنى مصر ))))
**********************
اللى بناه كان عامل حساب بكره
خلى الصحره تنادى على نيلها
وعلم ولادها الحب وللحرام تكره
وخلى البعيد بالشوق يغنى لها
*******************
اللى بناها طلع ع المأذنة كبر
تكبيره خلى جرس الكنيسة يرن
أصلهم اخوات والكل راح عمر
واللى يغيب عنها لأرضها بيحن
*********************
اللى بناها راح ع الهرم علاه
وخلى السواقى لزرعها تروى
ومية النيل بقلبه يا محلاه
وقمرها طالع ف السما يضوى
********************
اللى بناها وصى عياله وصيه
الارض زى العرض يا ولادى
افدوها بعنيكم وبرضه بعنيا
احلى بلاد ربنا بلادى
***********************
اللى بناها عمره ماكان غلباوى
عارف طريقه وفى العدل ماشى
لاعمره يعرف غل ولا لونه حرباوى
كلامه زى السيف وف نفع البشر ماشى
*************************
قبل ما يبنى شرب ميه من نيلها
ميه زلال شهد سكر مكرر
من حلاوة الميه راح قايم يغنيلها
بالعصيا رقص وللاغنيه كرر
***************************
اللى بناها ليه الجميل محفوظ
شاعر وكاتب ومن رجال الفن
رافع رايتها راوى نجيب محفوظ
قلمه ليه كل القلوب بتحن
*************************
اللى بناهاسالت على خده دموعه
بنى وعلاوخانه ولد خاين
زود عليه الهم وبكى قلبه ف ضلوعه
لكن ابنه الشهم للبنى صاين
**********************
اللى بناها حفر القناة بالفاس
على كتفه حمل رملة الصحره
والشمس فوق منه بتشوى الراس
لاهمه حر الشمس ولا تعويزة السحره
