محمد عزت فرج
ومع السلامة يابريزة
بودعك ياجنيه
ياما جبت حاجات لذيذة
وماكسرتش عشرة جنيه
واتفسحت أنا وعزيزة
حفلة سوايريه وماتينيه
**********************
احنا بتوع السيرفيس
أبو عشرين قرش يا بيه
وأجعصها تاكسي فيكي
كنا بنديله جنيه
والنص ده اكراميه
لما اللي يركب بيه
دلوقتي بقوا حرامية
مشوارهم خمسة جنيه
*********************
جري ايه ليك يادنيا
راح فين الربع جنيه
بحسبها طول الشهر
مابتجيش معايا ليه
خلاص أنا جالي القهر
وبقول ياناس بريه
واصبحت بكل الفخر
أكبر فلاسنجي يابيه
*********************
الواد أديله جنيه
بيبحلق ويبصلي فيه
ويقولي بكل بجاحة
قب بخمسة جنيه
أبص ليه وأستغرب
ماهو جيل واخد بالشبشب
بريزتهم الف جنيه
***********************
الواد بيقولي يا بابا
افرجها وفك ايديك
ده أنا ميدو نور عينيك
وإبعت كده جيبلي دليفري
لحسن أطلع عنيك
أقوله منين ياضنايا
ده باخد على قفايا
من يوم ماشرفت يابيه
**********************
وأنا ابص لجيبي الفاضى
واقول يارب انا راضى
بس ابعد عني مراطي
طلباتها كتير كده ليه
**********************
الله يرحم ايامك
واحشني أوي ياجنيه
ومع السلامة يابريزة
وبودعك ياجنيه
واللي حاله من حالي
يقول في سره أحيه