صلوات الروح
......... .
وفي عز ما كان الحلم ضباب
انا كنت بشوفك طاقة نور
بتطل ف وقت الكون ما يضيق
وبتغسل روحنا من الأوجاع
فبيصبح ضيق السكة براح
وبشوف الارض بتعطش شوق
وبتطرح ورد
وبشوف الحلم برغم الكد
ورغم النوح
لساه بيعافر و يا الأرض
علشان ما يكون الطرح عيدان
من قلب الطين
وف عز ما كان احلام الكل
اشكال وألوان
كان حلمي يا دوب
ألقى الانسان في عيون الناس
الليل اجراس
وانا وحدي بدق ساعات الكون
والحلم الطيب ما يبقاش
غير في السموات
صلوات الليل بتبوح بالسر
وبتفرش نور الله ع الأرض
فيكون عكاز لقلوب الخلق
ويكون تفاريح لبنات الارض
ياعيال الطين لو صنتوا العهد
كان اصبح كل الكون ده جنان
وفي عز ماكان الحلم وكان
انا لسه بدور ع الإنسان
