حصاد الوجع
محمد حامد
عشرين جنيه
واللحمه نار
شقيان انا طول النهار
ارجع انام
من غير عشى
واصحى الصباح
شايل همومى ومتكل
يمكن الاقى حد
عاوز له نفر---
يوميه عزيق
او حتى ف حصاد القصب
ساعه غضب
ساعتين تعب
وأنتى يا أمى بتستحى
تمدى ايديكى للجيران
تتسلفى
شايفك يا أمى بتطرحى
على كل جسر
نخله بترمى للجعان
حبه بلح
وعمرك ما حسيتى
بعطش
والترعه قدامك جفاف
كل القلوب صبحت عجاف
وانتى يا أمى بتمسحى
على كل عيل
م اليتامى بضحكتين
ونظره تطمن قلبهم
و أنا قبلهم
لما بحتاجك بلاقى ضمتك
وكأنى لسه بتولد
ومالى فرشتنا عياط
ظباط كتير
يا أمى شايفهم هنا
بيلفوا على كل النجوع
يمكن نجوع
يمكن نخاف
لكن يا أمى عمرنا
ما نكون خراف
ساحبنا راعى
وخلف منه ألف ديب
وضحكه تشيب
طالعه من القلب اللى نازف
م السكات
مشوار بيرجع ألف ميل
برميل وجع
دلقوا الزمان ف سكتى
وأنا الماشى بدون خطوات
