يا مصر القلب مش قادر يشوف غيرك
ولا قادر ينول... خيرِك
ولا قادر.. يكون من غير جناح طيرِك
يا أُمي... حسي بوجودي
دا انا الكلمة اللي فوق سطرك
طب اعمل إيه عشان خاطرك؟
عشان خاطرك.. أكون مدفع..
واكون كرباج على ضهر اللي يوم غشك
وقرب إيده من وشك وقالك إنه من جندك وحراسك
وع الخد اليمين ضربك.. وع الخد الشمال.. باسك!
ولو عايزة.. أكون تاجك واكون لو عايزة كناسك
واكون علمك.. واكون قلمك.. واكون حبرك وكراسك
أنا العطشان لنقطة فايضة من كاسك
لا انا طمعان انول دهبك ولا ماسك
دا انا ماسك بإيدي الجمر طول عمري
ولا خيبت يوم ظنك ولا كدبت إحساسك
يا أُمي إرفعي راسك ودوسي كل من داسك
وحبيني.. أنا شعبك.. أنا ناسك
أنا أرضك.. أنا فاسك أنا العايش بأنفاسك
يا شايلة كتير على اكتافك ومش همك..
وبتشيلي وساقيه الكل من دمك وبتقولي:
"فدا نييلي"
مصر.. الشعر ف عينيكي ما هوش سطرين بيتقالوا
ولا موال بيتغنى وانا قايله ومتقاله
ولا شوية كلام شعارات بيتحطوا.. ويتشالوا
