حزن البيوت
محمدعبدالرحيم
بندم لإنى بشبهك..
وبتشبهينى فى حبها
وبرضه زيى
ماتملكيش..
ولادقة واحدة فى قلبها
إرمى على حزن البيوت
دمعك
مين إللى شايفك..
ولامين سامعك
دا الجرح باعنى
والألم.. بايعك
لعينيها إيه يمنعنى
أرحل..ترحلى
وإيه يلومك لوفارقتى
حضنها..
ماانابرضه زيك
إبنها
...............
قالوا أمر المر آهة بتنحبس..
والغربة غربة حلم
بيننا بيتؤد
وأمانى فيها العمر
مش قد اللى راح..
جرح البعاد..
الحزن لما بيتفرض
أنا كل دول..
وإنتى وبقية حلمنا
وإن عشنا فيها عمر..
أكبر م إللى باقى
فى عمرنا
قالوا أمر المر
لما عليها نكره نفسنا..
ونموت فى كل دقيقة
جية مروحة
يللى دعاكى فى الضحى
مابقاش دعا..
يللى بكاكى
فى غنوة طالعة
مدمعة
ومسمعة..كل إللى غاوى
دموع..ألم
مش قادر أبكى..
بكيت كتير
مش قادر أصرخ..
أنفعل
وأنا بنقتل..حزن وندم
إرمى على
حزن البيوت دمعك
مين إللى شايفك..
ولامين سامعك
دا الجرح باعنى..
والألم بايعك
وإيه يلومك
لوفارقتى حضنها..
ماانا برضه زيك
إبنها
