وصيتك
محمدعبدالرحيم
دمعة واحدة..
ولايمكن دمعتين
غصب عنى..
خانوا عهدى فى مرتين
مرة وإنتى بابتسامتك
بتواسينى
مرة تانية ..
وإنتى برضه بتوحشينى..
كل ماابعد
عن عيونك
لحظتين
..........
إفتكرتك..ليه..نسيتك..
ماافتكرش
إحتملتك تانى راجعة..
مااحتملش
آه بحاول
أنسى دمعى..
بس دمعى
مابيحاولش
...........
وصتينى إنى ماابكى
ليه فى بعدك
طب قوليلى
يكون لمين الدمع بعدك
لليالى إللى فى غيابك
ببتديها
للأمانى اللى
فى بعادك
مش ناسيها
جربيها مرة واحدة
وحسى بيها
والنهاردة وصيتك..
أنا مش ناسيها
بس صعب
أكون فى جرحى
أمين عليها
...........
ياترى سامعانى..ياترى حسة بية..ياترى شايفانى
طب ماتسامحينى بقى..سامحينى علشان أرتاح..ولا انا مكتوب علية التعب والعذاب من بعدك..حبيبتى انا وفيت بوعدى ..أقسمت أغنيلك طول ماانا عايش ..أحكى لكل الناس حكايتك..وآدينى بغنى..وآدينى بحكى..حبيبتى انا لولا إيمانى لكنت جيتلك بعد مامشيتى بثوانى..كان زمانى دلوقت مش هنا..بس ماحبيتش أبعد عنك حتى فى العالم التانى..مش عايزة ليه تسامحينى..دا إنتى لوشوفتينى دلوقتى مش حتعرفينى..مش دا حبيبك ابدا..مش هوه..مش دى ملامحه..مش دى قسماته..وسامته إللى كنتى بتغنى بيها راحت..مابقاش فاضل منه غير قلب ولسان..علشان يحبك..ويغنيلك ..سامحينى..ولاعايزانى آجيلك..حاضر حجيلك..حجيلك أناقررت آجيلك..قررت آجيلك
